Er hægt að efna kosningaloforð til aldraðra? Haukur Arnþórsson í Öndvegi 23. nóv

Í Öndvegiskaffi RA næstkomandi fimmtudag mun dr. Haukur Arnþórsson kynna niðurstöður rannsóknar á kjörum aldraða á árunum 2007-2016 og hvaða breytingar voru gerðar 2017. Fram kemur hvar staðan er góð og hvar hún er erfið. Kynnt eru meðaltöl, bæði fyrir aldraða í heild og fyrir ákveðna tekjuhópa og eignahópa og meðal annars fjallað um ólíkan tekjuuppruna. Áhersla er lögð á að skoða eftirlaun (e. pension), sem eru greiðslur almannatrygginga og lífeyrissjóða. Þá verður farið yfir hvað raunhæft er að gera ef stjórnmálalegur vilji er fyrir aðgerðum í þágu aldraðra. 
Rannsóknin var unnin að beiðni Félags eldri borgara í Reykjavík. 

Samkvæmt venju verður fundurinn haldinn í fundarsal ReykjavíkurAkademíunnar í Þórunnartúni 2, 4. hæð (þar sem Bókasafn Dagsbrúnar er til húsa). 

Allir velkomnir. Léttar veitingar á boðstólum. 

Á jaðrinum? Ráðstefna um óleyfisbúsetu í atvinnuhúsnæði í Norræna húsinu 17. nóv

ReykjavíkurAkademían og Reykjavíkurborg blása til ráðstefnu föstudaginn 17. nóvember næstkomandi um óleyfisbúsetu í atvinnuhúsnæði.

Skortur á leiguhúsnæði og hátt leiguverð veldur því að óhefðbundið búsetuform er vaxandi vandamál hérlendis. Talið er að hópur efnalítilla Íslendinga og erlent verkafólk búi við slíkar aðstæður. 

Ráðstefnan er mikilvægur áfangi í umfangsmikilli úttekt RA á þessu vaxandi samfélagslega vandamáli. Helstu samstarfsaðilar RA og Reykjavíkurborgar í verkefninu eru Slökkvilið höfuðborgarsvæðisins, Hagstofa Íslands, Þjóðskrá Íslands, Vinnumálastofnun, ASÍ, Starfsgreinasamband Íslands, Retor fræðsla ehf., ásamt mörgum fleiri. 

Aðalfyrirlesari á ráðstefnunni er Gillian Young frá Newhaven Research í Skotlandi. Gillian er öflugur fræðimaður á sviði húsnæðismála og búsetu í óleyfilegu húsnæði, þá sérstaklega þegar kemur að búsetuskilyrðum erlends verkafólks. 

Ráðstefnan verður haldin í sal Norræna hússins. Aðgangur ókeypis og allir velkomnir.  

Sjá dagskrá

Hvernig getur stefna Trumps ógnað Íslandi? Árni Finnsson fjallar um loftslagsbreytingar í Öndvegi

Í Öndvegi fimmtudaginn 2. nóvember næstkomandi mun Árni Finnsson stíga á stokk og fjalla um loftslagsbreytingar og þær ógnir sem stafa af stefnu Donalds Trumps, Bandaríkjaforseta, í loftslagsmálum. Samkvæmt venju verður fundurinn haldinn í fundarsal RA í Bókasafni Dagsbrúnar á fjórðu hæð í Þórunnartúni 2, kl. 12:00-13:00. Aðgangur er ókeypis og allir velkomnir.  Léttar veitingar í boði. 

Framtíð íslenska lýðveldisins eftir Hrunið - Hnignun eða uppbygging lýðræðis?

Vetrarstarf viðburðarins Í öndvegi hefst fimmtudaginn 19. október og verður hann til húsa sem fyrr í fundarsal RA í bókasafni Dagsbrúnar á 4.hæð í Þórunnartúni 2. 

Prófessor emeritus Svanur Kristjánsson ríður á vaðið og fjallar um "Framtíð íslenska lýðveldisins eftir Hrunið - Hnignun eða uppbygging lýðræðis." Fyrilestur og umræður standa yfir í um eina klukkustund eða frá kl. 12:00 til 13:00. 

Allir velkomnir meðan húsrúm leyfir. Léttar veitingar í boði ásamt frábærum félagsskap!