ingihrafn.jpgFöstudaginn, 7. maí, kl. 17:00 opnar sýning í Hoffmannsgalleríi undir heitinu VINNUSTOFA.

Á sýningunni eru verk eftir 7 fatlaða listamenn sem hafa unnið í nokkurs konar vinnustofu í Myndlistaskólanum í Reykjavík í vetur. Vinnustofan er samstarfsverkefni Myndlistaskóla Reykjavíkur og Fjölmenntar, símenntunar- og þekkingarmiðstöðvar. Síðastliðna tvo vetur hefur Myndlistaskólinn boðið heilsvetrarnám í myndlist fyrir fatlað fólk og er markmið námsins að þátttakendur kynnist helstu aðferðum í hugmyndavinnu og útfærslu í myndlist og þeir finni eigin styrk og listræna sérstöðu.

halldra.jpgÍ upphafi vetrar var byrjað á því að kanna hvað hver einstaklingur hefði áhuga á að gera og með tiliti til fyrri vinnu og verka stakk leiðbeinandinn upp á plani fyrir hann að vinna eftir. Leiðbeinandinn fylgdist síðan með vinnunni, aðstoðaði eftir þörfum, benti á það sem betur mætti fara og mögulegar úrvinnsluleiðir. Hann fylgdist með framvindu nemandans og hjálpaði honum að teygja út ramma sinn og fjölga möguleikum sínum. Það var þó nemandinn sem réð ferðinni allan tímann.

Myndefni og vinnuaðferðir listamannanna eru mjög fjölbreytt og spegla persónuleika og sýn listamananna á lífið og umhverfi sitt.

 

Guðmundur er ljóðrænn í sínum verkum. Hann hefur mestan áhuga að fást við náttúruna og einnig dúkka upp senur úr kvikmyndum. Hjá Ragnari er það hins vegar línan sem er mest áberandi í verkum hans. Þau eru að mestu abstrakt en inn á milli má sjá þekkjanleg fyrirbrigði. Ingi Hrafn hefur sérstakan áhuga á kirkjum og er Hallgrímskirkja í sérstöku uppáhaldi. Gréta er mest í teiknimyndum sem hún vinnur af mikilli nákvæmni og byggir á nákvæmri undirbúningsvinnu. Sigurður hefur unnið kraftmikil málverk eftir fjölbreytilegum fyrirmyndum úr blöðum. Elín hefur unnið með trélitum og blýanti og spunnið sínar teikningar áfram og látið dálítið ráðast hvað fæðist sigururreynir.jpgog kannski er undirmeðvitundin með í ráðum. Verk Halldóru eru skreytikennd og í sterkum litum, teiknuð með tússpennum. Sum verka hennar eru abstrakt, önnur fígúratíf og enn önnur eitthvað þar á milli.

Sýningin er hluti af hátíðinni List án landamæra.

Hoffmannsgallerí er staðsett í húsnæði ReykjavíkurAkademíunnar á 4. hæð JL hússins við Hringbraut 121.

Sýningin er opin alla virka daga frá 9:00 - 17:00 og stendur fram á haust.

 

 

Listamennirnir eru:
Guðmundur Stefán Guðmundsson
Ragnar Már Ottósson
Ingi Hrafn Stefánsson
Gréta Guðbjörg Zimsen
Sigurður Reynir Ármannsson
Elín S. M. Ólafsdóttir
Halldóra Jónsdóttir

 

Leiðbeinandi: Kristinn G. Harðarson

FaLang translation system by Faboba