Í Gammablossum 6. maí flytur Tinna Laufey Ásgeirsdóttir, fyrirlesturinn „Bernska ofurseld valdi. - Hag- og sagnfræðileg greining." Fyrirlesturinn hefst klukkan 12.05 og stendur til klukkan 13.00. Allir velkomnir.

Dr. Tinna Laufey Ásgeirsdóttir er lektor í hagfræði við Háskóla Íslands og hefur umsjón með meistaranámi í heilsuhagfræði við skólann. Hún lauk doktorsprófi í hagfræði frá University of Miami í Bandaríkjunum en þar á undan lauk hún B.A.-prófi í sagnfræði frá Háskóla Íslands.

Yfirlit fyrirlestrarins:
Tinna Laufey mun ræða stöðu bernskunnar í tímans rás, hvernig samspili barna og fjölskyldna þeirra hefur verið háttað á nýöld í Evrópu og hvaða breytingum þetta samband hefur tekið á tuttugustu öld. Hún mun spá í hvernig nota má sagn- og hagfræðina til að draga saman upp áhugaverða mynd af þróun bernskunnar. Tinna Laufey mun jafnframt velta fyrir sér forsendum ríkisinngripa á síðari tímum og áhrifum þeirra á samskipti barna og foreldra í framtíðinni.