Prisma aftur í vetur - skráning hafin!

prisma 2010 auglsing.jpgPrisma er nýsköpun í námi.

Prisma er nýtt þverfaglegt diplómanám sem Listaháskóli Íslands og Háskólinn á Bifröst skipulögðu í samvinnu við ReykjavíkurAkademíuna.

Til þessa hafa um það bil 90 nemendur útskrifast með diplóma í Prisma.

Opnað hefur verið fyrir umsóknir í Prisma á vorönn 2010 en umsóknarfrestur er til 3. desember.

Boðið verður upp á 16 eininga (ECTS) nám í febrúar og mars, í samanlagt 8 vikur.

Kennsla fer fram á Fríkirkjuvegi 11 í Reykjavík og skólagjöld eru áætluð á bilinu kr. 160.000 - 195.000.

Allt lesefni er innifalið í þeirri upphæð.

 

Útskrifaðir hafa verið tveir nemendahópar til þessa með 12 og 16 eininga (ECTS) diplómagráður. Útskriftarnemar eru um það bil 90 talsins úr hinum ýmsu geirum, s.s. viðskiptum, þjónustu, myndlist, arkitektúr, leiklist, fjármálageira, stjórnunar- og menntastörfum, heilbrigðisgeira og svona mætti áfram telja.

Skilyrði fyrir inngöngu er stúdentspróf eða jafngildi þess og hafa nemendur verið á aldursbilinu 19-67 ára.

 

Dæmi um svör nemenda úr kennslukönnun í október 2009:

„Prisma er mögnuð verkfærataska"
„er að stofna fyrirtæki og láta draum rætast"
„heimurinn hefur opnast og tækifærin eru óþrjótandi"
„tjái mig skýrar og framkvæmi - finnst ég geta allt!"
„hef fundið nýjar og óvenjulegar leiðir til að framkvæma og hugsa"
„eftir Prisma stóð ég uppi sem sigurvegari gagnvart sjálfri mér"
„allt annað sjónarhorn á heiminn og sjálfan mig"
„hagnýt þekking fyrir líf og vinnu"


Prisma var sett á laggirnar sem viðbrögð Listaháskólans og Háskólans á Bifröst við því ástandi sem skapaðist hér á landi í kjölfar bankahruns. Námið hefur vakið athygli hér heima og erlendis enda er um nýsköpun í menntun að ræða. Fjöldi hugmynda og spennandi verkefna hafa sprottið upp í náminu og verið hrint í framkvæmd.


Prisma hefur átt í nánu samstarfi við ýmis fag- og stéttarfélög og Vinnumálastofnun. Umsækjendur geta sótt um námsstyrk til niðurgreiðslu á skólagjöldum frá stéttar- og fagfélögum og hjá Vinnumálastofnun. Vinnumálastofnun heimilar nemendum á atvinnuleysisbótum að stunda námið og halda bótum að uppfylltum ákveðnum skilyrðum og er þá gerður um það námssamningur. Umsækjendum um námið er bent á að snúa sér til ráðgjafa stofnunarinnar til að kanna málið.


Prisma námið nýtist sérstaklega þeim einstaklingum sem vilja horfa gagnrýnum og uppbyggilegum augum á samtímann, efla færni sína í að starfa á fleiri sviðum en áður og styrkja stöðu sína á vinnumarkaði.
Meginþáttur í aðferðafræði kennslu og fyrirkomulags er skapandi og gagnrýnin hugsun en burðargreinar eru listfræði og heimspeki. Mörgum tengdum fögum er fléttað saman við meginþátt námsins s.s. ímyndafræði, menningarstjórnun, frumkvöðlafræði, hönnun og tíðaranda, myndmálssögu, tónlistarsögu og -miðlun, skapandi skrifum, aðferðafræði myndlistar og leikhúss, arkitektúr og skipulagi, miðlunarfræði, mannfræði, markaðsfræði og stjórnun. Að auki er boðið upp á gestafyrirlestra einu sinni í viku þar sem sérfræðingar segja frá því sem er að gerast í stefnumótun, rannsóknum og nýsköpun í samfélaginu og utan landsteinanna.


Yfir 40 sérfræðingar koma að náminu


Yfir 40 sérfræðingar víðsvegar að úr samfélaginu hafa komið að kennslu í Prisma. Meðal þeirra eru Jón Ólafsson heimspekingur, Hallgrímur Helgason rithöfundur, Haukur Ingi Jónasson, guðfræðingur og sálgreinandi, Njörður Sigurjónsson, viðskiptafræðingur og heimspekingur, Kristín Eysteinsdóttir leikstjóri, Ágúst Einarsson, rektor Háskólans á Bifröst, Andri Snær Magnason rithöfundur, Guðmundur Oddur Magnússon (Goddur), prófessor við Listaháskólann, Sveinbjörn I. Baldvinsson, handritshöfundur, Viðar Hreinsson framkvæmdarstjóri ReykjavíkurAkademíunnar, Hjálmar Ragnarsson, rektor LHÍ og tónskáld, Halldór Björn Runólfsson, forstöðumaður Listasafns Íslands, Sigríður Ingvarsdóttir, rekstrarstjóri frumkvöðlaseturs hjá Nýsköpunarmiðstöð, Sumarliði R. Ísleifsson sagnfræðingur, Þorvaldur Þorsteinsson, rithöfundur og myndlistarmaður, Dóra Ísleifsdóttir, fagstjóri í grafískri hönnun, Halla Tómasdóttir, stjórnarformaður Auður Capital, Sigrún Birgisdóttir, arkitekt og lektor við LHÍ, Guðjón M. Guðjónsson frumkvöðull, Guðfinna Mjöll Magnúsdóttir hönnuður ofl.

Skipulag námsins og fyrirkomulag

Námið er á háskólastigi og ætlað fólki sem hefur að lágmarki stúdentspróf eða jafngildi þess. Að gefnum ákveðnum skilyrðum geta nemendur fengið Prisma metið til 12 eininga (ECTS) í bakkálárnám á Háskólanum á Bifröst og til 6 eininga (ECTS) í meistaranám á Bifröst og Kennslufræðum í Listaháskóla Íslands, að gefnum ákveðnum skilyrðum.
Nánari upplýsingar veitir:
Hrund Gunnsteinsdóttir forstöðukona Prisma í síma 895 6371 eða á This email address is being protected from spambots. You need JavaScript enabled to view it.. Einnig er hægt að nálgast upplýsingar um námið á heimasíðum skólanna: www.lhi.is og www.bifrost.is

FaLang translation system by Faboba