(354) 562 8565 ra@akademia.is
  1. Forsíða
  2.  » 
  3. Fréttir
  4.  » Af fyrirlestri Arnþórs Gunnarssonar um bókina Hæstiréttur í hundrað ár (upptaka)

Af fyrirlestri Arnþórs Gunnarssonar um bókina Hæstiréttur í hundrað ár (upptaka)

Í dag, 17. mars, fjallaði Arnþór Gunnarsson sagnfræðingur við RA í fyrirlestri um nýútkomna bók sína Hæstiréttur í hundrað ár. Saga. Í fyrirlestrinum ræddi Arnþór meðal annars hvernig hann nálgaðist verkefnið og mótaði það, hvaða áskoranir það fól í sér og helstu niðurstöður. Einnig var vikið nokkuð að þeim viðtökum sem bókin hefur fengið. Líflegar umræður spunnust að loknum fyrirlestrinum sem bæði var streymt og tekinn upp.

Upptaka af fyrirlestrinum 

Hæstiréttur í hundrað ár. Saga kom út hjá Hinu íslenska bókmenntafélagi árið 2021 í tilefni af aldarafmæli réttarins 16. febrúar 2020.fyrirlestur Stofnun Hæstaréttar Íslands var mikilvægur áfangi í sjálfstæðisbaráttu þjóðarinnar enda fengu Íslendingar þá í hendur æðsta dómsvald í eigin málum. Saga Hæstaréttar er samofin sjálfstæðisbaráttunni og þróun stjórnmála innanlands. Oft hefur gustað um réttinn og jafnvel verið vegið að sjálfstæði hans en í annan tíma hefur rétturinn notið virðingar og friðhelgi. Þetta er viðburðarík saga sem varpar ljósi á íslenskt samfélag.

Arnþór Gunnarsson (f. 1965) er sjálfstætt starfandi sagnfræðingur. Hann hefur ritað bækur og fjölda greina í blöð og tímarit. Helstu ritverk: Hæstiréttur í hundrað ár. Saga (2021), Saga flugvalla og flugleiðsögu á Íslandi (2018), Lífæðin/Lifeline, ásamt Pepe Brix (2016), Á afskekktum stað (2011), Guðni í Sunnu. Endurminningar og uppgjör (2006), Fiskisagan flýgur (2005), Saga Hafnar í Hornafirði I–II (1997 og 2000).