Úthlutun styrkja úr Starfslaunasjóði sjálfstætt starfandi fræðimanna var tilkynnt við athöfn í Landsbókasafni 16. maí.
Áslaug Arna Sigurbjörnsdóttir, háskóla-, iðnaðar- og nýsköpunarráðherra, ávarpaði gesti og afhenti styrkþegum blóm.
Veittir voru styrkir til 17 sjálfstætt starfandi fræðimanna til metnaðarfullra verkefna sem spanna vítt svið. ReykjavíkurAkademían óskar styrkþegum til hamingju og sérstaklega þeim Arnþóri Gunnarssyni, Báru Baldursdóttur og Gunnari Þorra Péturssyni sem öll starfa í ReykjavíkurAkademíunni og félögum í Félagi ReykjavíkurAkademíunnar þeim Árna Daníel Júlíussyni, Árna Heimi Ingólfssyni, Clarence Edvin Glad og Sigríði Matthíasdóttur.
Nánari upplýsingar um stykþegana, verkefni þeirra og fjölda úthlutunarmánuða eru á vef Rannís. Þangað var einnig hópmyndin af styrkþegunum ásamt Áslaugu Örnu Sigurbjörnsdóttur háskólaráðherra sótt.
__________
Starfslaunasjóður sjálfstætt starfandi fræðimann er samkeppnissjóður sem hefur það meginhlutverk að launa starfsemi þeirra fræðimanna sem starfa sjálfstætt í sinni fræðigrein. Alls bárust 53 umsóknir í sjóðinn og sótt um starfslaun til 420 mánaða eða rúmra 213 milljóna kr. Veittar voru tæpar 49 milljónir og þurfti stjórn að hafna mörgum styrkhæfum verkefnum. Starfslaun sjóðsins árið 2023 eru 507.500 kr. á mánuði (um verktakagreiðslur er að ræða).
ReykjavíkurAkademían skipar einn af þremur fulltrúum í stjórn Starfslaunasjóðs. Fulltrúi ReykjavíkurAkademúnnar 2022-2025 er Þórunn Sigurðardóttir. Formaður stjórnarinnar er Ágústa Guðmundsdóttir og auk þeirra situr Jón Yngvi Jóhansson í stjórn sjóðsins, tilnefndur af Hagþenki.